آئیے حدیث رسول پڑھیں

نخبۃ الاحادیث
تالیف فضیلۃ الشیخ محمد داؤد رحمۃ اللہ علیہ

ترجمہ و تشریح
ڈاکٹر عبدالحئی مدنی حفظہ اللہ

کھانا کھانے کے آداب

عَن٘ عُمَرَ ب٘نِ أَبِی٘ سَلَمَۃَ ص قَالَ : قَالَ لِی٘ رَسُو٘لُ اللّٰہِ ا : ’’سَمِّ اللّٰہَ وَکُل٘ بِیَمِی٘نِکَ وَکُل٘ مِمَّا یَلِی٘کَ ۔‘‘
تخریج : صحیح بخاری ، کتاب الأطعمۃ ، حدیث نمبر :۵۳۷۶ ۔و صحیح مسلم ، کتاب الأشریۃ ، حدیث نمبر :۵۲۶۹
راوی کا تعارف : نام/ عمر بن أبی سلمۃ عبد اللہ بن عبد الأسد ۔ مخزومی ، قرشی۔
ام المؤمنین حضرت ام سلمہ کا پہلے شوہر ابو سلمہ کے بیٹے ہیں ، کچھ عرصہ رسول اللہ ا کی زیرِ کفالت رہے ۔
وفات : ۸۳ ہجری مدینہ منورہ میں ہوئی۔
عدد المرویات : بارہ احادیث

معانی الکلمات
سَمِّ: نام لو Mention the name
بِیَمِی٘نِکَ : اپنے دائیں ہاتھ کے ساتھ With your right hand
کُل٘ : کھاؤ Eat up
مِمَّا : اس سے From that
یَلِی٘کَ : جو آپ کے سامنے ہے What is in font of you

ترجمہ : سیدنا عمر بن ابی سلمہ رضی اللہ عنہ روایت کرتے ہیں کہ مجھے رسول اللہ ا نے فرمایا: ’’اللہ کانام لیکر اپنے دائیں ہاتھ سے اور اپنے سامنے سے کھاؤ۔‘‘

تشریح: شریعت اسلامیہ ایک مکمل ضابطہ حیات ، دستور زندگی ہے جو نہ صرف کہ عبادت ومعاملات میں ہماری رہنمائی کرتی ہے ایک مخصوص ثقافت اور آداب زندگی بھی سکھاتی ہے ۔
خوردونوش لوازماتِ زندگی میں سے ہے لہذا اس کے متعلق بھی دینِ اسلام نے جملہ تفصیلات ، احکام اور آداب سکھائے ہیں چنانچہ مذکورہ حدیث میں حکم دیا گیا ہے کہ اللہ کا نام لیکر کھانا شروع کریں کیونکہ اسی رب کی طرف سے رزق ملتا ہے ، اسباب رزق بھی وہی عطا فرماتا ہے ۔ مزید برآں اس کا مقدس نام باعثِ برکت بھی ہے ۔ اسی طرح دائیں ہاتھ سے کھانا پینا ، اور اپنے سامنے سے لینا بھی احکام وآداب میں شامل ہے ۔ دوسروں کے سامنے سے اچھا لقمہ، گوشت وغیرہ اٹھانا انتہائی معیوب گردانا گیا ہے ۔